لاہور: 27 اکتوبر (ڈیجیٹل اطلاع) — لاہور کے علاقے جوہر ٹاؤن میں آن لائن بائیک سروس کے دوران خاتون کو مبینہ ہراسانی کا نشانہ بنانے کا انتہائی افسوسناک واقعہ سامنے آیا ہے، جہاں اپنے تحفظ کی خاطر خاتون نے چلتی موٹر سائیکل سے چھلانگ لگا دی۔
درج کی گئی ایف آئی آر (FIR) کے مطابق آن لائن بائیک رائیڈر نعیم نے دورانِ سفر خاتون پر مبینہ طور پر نازیبا حرکات کے لیے دباؤ ڈالا اور ہراساں کیا۔ رائیڈر کی نامناسب حرکات سے تنگ آ کر اور خود کو محفوظ رکھنے کے لیے خاتون نے جوہر ٹاؤن جی فور کے علاقے میں چلتی موٹر سائیکل سے چھلانگ لگا دی۔ اس خطرناک قدم کے نتیجے میں خاتون کے سر، منہ، ناک اور گلے پر شدید چوٹیں آئیں۔
مقدمے کے متن کے مطابق خاتون کے سڑک پر گرتے ہی ملزم رائیڈر نعیم موقع سے فرار ہو گیا۔ پولیس نے واقعے کا مقدمہ درج کر کے ملزم کی گرفتاری کے لیے چھاپے مارنا شروع کر دیے ہیں، جبکہ شہریوں اور سماجی حلقوں نے آن لائن رائڈ سروسز میں خواتین کے تحفظ کے حوالے سے سخت تشویش کا اظہار کرتے ہوئے ملزم کو سخت سے سخت سزا دینے کا مطالبہ کیا ہے۔
تازہ ترین پوسٹس
