کار چوروں کا تعاقب کرنے والے معروف صنعت کار میاں ریحان اشرف فائرنگ سے جاں بحق: سی پی او کا نوٹس، سپیشل ٹیمیں تشکیل

فیصل آباد: 18 اکتوبر 2026 (ڈیجیٹل اطلاع): چناب کلب کے باہر سے گاڑی چوری کر کے فرار ہونے والے مسلح چوروں کا تعاقب کرنے کے دوران فائرنگ سے جمسا کمپنی کے مالک اور جی ایم ایس اے  گروپ کے سرکردہ صنعت کاروں میاں محمد اکرم اور میاں محمد ارشد کے بھتیجے، معروف کاروباری شخصیت میاں ریحان اشرف جاں بحق ہو گئے۔

پولیس و باضابطہ تفصیلات کے مطابق میاں ریحان اشرف تھانہ سول لائنز کی حدود میں واقع چناب کلب میں ایک خاندانی تقریب میں شرکت کے لیے آئے تھے، جہاں سے نامعلوم چور ان کی پجارو گاڑی چوری کر کے فرار ہو گئے۔

گاڑی چوری کا علم ہوتے ہی میاں ریحان اشرف نے فوراً ملزمان کا تعاقب کیا، جو تھانہ صدر کی حدود میں جڑانوالہ و ستیانہ روڈ کی طرف جا رہے تھے۔ تعاقب کے دوران مسلح چوروں نے ان کی گاڑی پر براہِ راست فائرنگ کر دی، جس کے نتیجے میں گردن پر گولی لگنے سے میاں فرحان ریحان موقع پر ہی جاں بحق ہو گئے جبکہ ملزمان گاڑی سمیت فرار ہونے میں کامیاب ہو گئے۔

واقعے کا فوری نوٹس لیتے ہوئے سٹی پولیس آفیسر (سی پی او) فیصل آباد تنویر حسین نے ایس پی اقبال ڈویژن سعید احمد سے تفصیلی رپورٹ طلب کر لی ہے اور ان کی سربراہی میں ملزمان کی گرفتاری کے لیے خصوصی پولیس ٹیمیں تشکیل دے دی ہیں۔

پنجاب فارنزک سائنس ایجنسی  کی ٹیموں نے موقع پر پہنچ کر تمام فارنزک شواہد اکٹھے کر لیے ہیں جبکہ ضلع بھر کی داخلی و خارجی شاہراہوں پر ناکہ بندی کر دی گئی ہے۔ سی پی او تنویر حسین کا کہنا ہے کہ پولیس تمام جدید تکنیکی و انتظامی وسائل بروئے کار لاتے ہوئے ملزمان کو جلد از جلد گرفتار کر کے کیفرِ کردار تک پہنچائے گی۔