5 کروڑ روپے مالیت کی جائیداد کی مبینہ جعلی سیل ڈیڈ تیار کرنے والا رجسٹری محرر گرفتار

فیصل آباد: 14 نومبر 2026 (ڈیجیٹل اطلاع) محکمہ اینٹی کرپشن اسٹیبلشمنٹ فیصل آباد نے کارروائی کرتے ہوئے 5 کروڑ روپے مالیت کی قیمتی جائیداد کی مبینہ بوگس سیل ڈیڈ تیار کرنے کے مقدمے میں نامزد رجسٹری محرر منیر احمد کو گرفتار کر لیا ہے۔

اینٹی کرپشن حکام کے مطابق گرفتار ملزم منیر احمد، جو ریونیو ڈیپارٹمنٹ فیصل آباد اربن ون میں بطور رجسٹری محرر تعینات تھا، پر دیگر شریک ملزمان کے ساتھ مبینہ ملی بھگت کر کے 5 کروڑ روپے مالیت کی جائیداد کی جعلی سیل ڈیڈ تیار کرنے کا الزام ہے، جس کے ذریعے اصل مالک کو اس کی جائیداد سے محروم کرنے کی کوشش کی گئی تھی۔ اس فراڈ کے حوالے سے 9 ستمبر 2023 کو تھانہ کوتوالی فیصل آباد میں مقدمہ نمبر 834/2023 درج کیا گیا تھا۔

اینٹی کرپشن ترجمان کے مطابق سرکل آفیسر راشد محمود اور ان کی ٹیم نے کارروائی کرتے ہوئے نامزد ملزم منیر احمد کو گرفتار کر لیا ہے، جس سے مقدمے میں ملوث دیگر ملزمان کی گرفتاری اور جعلی دستاویزات کی تیاری کے حوالے سے مزید تفتیش جاری ہے۔