کوہ نور کے علاقے میں سیلز گرل پر تشدد کا واقعہ: ملزم حامد کی 50 ہزار روپے مچلکوں کے عوض ضمانت منظور

فیصل آباد: 10 نومبر 2026 (ڈیجیٹل اطلاع) فیصل آباد کے تجارتی علاقے کوہ نور میں واقع خواتین کے ملبوسات کی دکان پر سیلز گرل کو تشدد کا نشانہ بنانے والے ملزم حامد کو عدالت نے 50 ہزار روپے کے ضمانتی مچلکوں کے عوض ضمانت دے دی ہے، تاہم مچلکے اور شخصی ضمانت جمع نہ کرانے پر ملزم کو جیل منتقل کر دیا گیا ہے۔

تفصیلات کے مطابق تھانہ مدینہ ٹاؤن پولیس نے کوہ نور کے علاقے میں دکان پر بحث کے دوران سیلز گرل پر تشدد کرنے اور تھپڑ مار کر زمین پر گرانے کے مقدمے میں گرفتار ملزم حامد کو جوڈیشل مجسٹریٹ راؤ اعجاز احمد کی عدالت میں پیش کیا۔ تفتیشی افسر نے ملزم کے 14 روزہ جوڈیشل ریمانڈ کی استدعا کی، تاہم عدالت نے 50 ہزار روپے کے ضمانتی مچلکوں کے عوض ضمانت منظور کی۔ عدالت نے حکم دیا کہ مچلکے اور شخصی ضمانت جمع نہ کرانے کی صورت میں ملزم کو جوڈیشل لاک اپ بھجوا دیا جائے اور 24 نومبر کو دوبارہ پیش کیا جائے۔

ترجمان پولیس کے مطابق واقعے کی ویڈیو سوشل میڈیا پر وائرل ہونے کے بعد مدینہ ٹاؤن پولیس نے فوری یکشن لیتے ہوئے مقدمہ درج کر کے ملزم کو گرفتار کیا تھا۔ قانونی ضوابط کے مطابق ضمانتی مچلکے جمع نہ ہونے کے باعث ملزم حامد کو فوری طور پر جیل منتقل کر دیا گیا ہے۔